ನವದೆಹಲಿ: ವಾಹನ ಸವಾರರಿಗೆ ಅನುಕೂಲವಾಗುವಂತೆ ಕೇಂದ್ರ ಸರ್ಕಾರ ದಾಖಲೆಗಳನ್ನು ಡಿಜಿಟಲೀಕರಣ ಮಾಡಿದೆ. ಗಾಡಿಗಳಿಗೆ ಸಂಬಂಧ ಪಟ್ಟಂತ ಆರ್‌ಸಿ ಬುಕ್, ಇನ್ಶುರೆನ್ಸ್, ಲೈಸೆನ್ಸ್ ಇಟ್ಟುಕೊಂಡು ಓಡಾಡಬೇಕಾಗಿಲ್ಲ. ಆ ಎಲ್ಲ ದಾಖಲೆಗಳನ್ನು ಮನೆಯಲ್ಲೇ ಮರೆತು ಬಂದರೂ ಟ್ರಾಫಿಕ್ ಪೊಲೀಸರಿಗೆ ನೀವು ಹೆದರುವಂತಿಲ್ಲ. ಈ ಎಲ್ಲ ದಾಖಲೆಗಳನ್ನು ನಿಮ್ಮ ಮೊಬೈಲ್‌ನಲ್ಲಿಟ್ಟುಕೊಂಡಿದ್ದರೆ ಸಾಕು.
ಇಂದಿನಿಂದ ದೇಶಾದ್ಯಂತ ಈ ಹೊಸ ಟ್ರಾಫಿಕ್ ನಿಯಮಗಳು ಜಾರಿಗೊಳ್ಳಲಿವೆ. ದೇಶಾದ್ಯಂತ ಏಕರೂಪದ ಆರ್‌ಸಿ, ಡ್ರೈವಿಂಗ್ ಲೈಸೆನ್ಸ್ ನೀಡುವ ವಿಧಾನ ಜಾರಿಗೆ ಬರಲಿದೆ. ಇನ್ನು ಮುಂದೆ ಆರ್‌ಸಿ ಬುಕ್‌ಗಳನ್ನು ಕೂಡ ಎಲೆಕ್ಟ್ರಾನಿಕ್ ಕಾರ್ಡ್ ರೂಪದಲ್ಲಿ ನೀಡಲಾಗುವುದು. ಡ್ರೈವಿಂಗ್ ಲೈಸೆನ್ಸ್ ಕಾರ್ಡ್ ಕೂಡ ಡಿಜಿಟಲೀಕರಣಗೊಳ್ಳಲಿದ್ದು, ಇದರಲ್ಲಿ ಮೈಕ್ರೋ ಚಿಪ್ ಇರಲಿದೆ. ವಾಹನ ಸವಾರರು ಚಾಲನಾ ಪರವಾನಿಗೆ ಹಾಗೂ ಆರ್‌ಸಿಗಳನ್ನು ಅಪ್ಡೇಟ್ ಮಾಡಿಕೊಳ್ಳಬೇಕಾಗುತ್ತದೆ.
ಹೊಸದಾಗಿ ಬರುವ ಡಿಎಲ್ ಮತ್ತು ಆರ್‌ಸಿಗಳು ಸ್ಮಾರ್ಟ್ ತಂತ್ರಜ್ಞಾನವನ್ನು ಹೊಂದಿರಲಿವೆ. ಹೊಸ ಕಾರ್ಡಲ್ಲಿ ಅತ್ಯಾಧುನಿಕ ಮೈಕ್ರೋ ಚಿಪ್ ಇರಲಿದ್ದು, ಕ್ಯೂಆರ್ ಕೋಡ್ ಇರಲಿದೆ. ಈ ಕಾರ್ಡ್‌ಗಳು ಎಟಿಎಂ ಕಾರ್ಡ್ ರೀತಿಯಲ್ಲಿ ಕಾರ್ಯ ನಿರ್ವಹಿಸುತ್ತದೆ. ಅಲ್ಲದೆ, ಡ್ರೈವಿಂಗ್ ಲೈಸೆನ್ಸ್‌ನ ಕಾರ್ಡ್‌ನಲ್ಲಿರುವ ಚಿಪ್‌ನಿಂದಾಗಿ ವಾಹನ ಸವಾರರ ಎಲ್ಲ ಮಾಹಿತಿಗಳನ್ನೂ ಸುಲಭವಾಗಿ ಕಂಡುಹಿಡಿಯಬಹುದು. ಈ ಎಲೆಕ್ಟ್ರಾನಿಕ್ ಕಾರ್ಡ್ ಮೂಲಕ ವಾಹನ ಸವಾರರ 10 ವರ್ಷದೊಳಗಿನ ವಾಹನಕ್ಕೆ ಸಂಬಂಧಿಸಿದ ಎಲ್ಲ ಮಾಹಿತಿಯನ್ನೂ ಪಡೆಯಬಹುದಾಗಿದೆ.
