ನವದೆಹಲಿ : ಇಂದು ದೇಶದ ಜನರನ್ನುದ್ದೇಶಿಸಿ ಪ್ರಧಾನಿ ಮೋದಿ ಅವರು ಆನ್ ಲೈನ್ ನಲ್ಲಿ ಮಾತನಾಡಿದರು. ಜೊತೆಗೆ ಜನರಿಗೆ ಸ್ವಲ್ಪ ಎಚ್ಚರಿಕೆಯನ್ನು ನೀಡಿದ್ದಾರೆ. ಅನೇಕ ಕಡೆ ಲಾಕ್ಡೌನ್ ಅಂತ್ಯಗೊಂಡಿದ್ದರೂ ವೈರಸ್ ಆರ್ಭಟ ನಿಂತಿಲ್ಲ. ಆದ್ದರಿಂದ ಜನರು ಎಚ್ಚರಿಕೆಯಿಂದ ಇರಬೇಕು. ಲಸಿಕೆ ಬರುವವರೆಗೂ ಜನರು ಕೊರೋನಾ ನಿಯಮಗಳನ್ನ ತಪ್ಪದೇ ಪಾಲಿಸಬೇಕು ಎಂದು ಮನವಿ ಮಾಡಿದರು. ನಾವು ವೈರಸ್ ವಿರುದ್ಧ ಸಮರ್ಥವಾಗಿ ಹೋರಾಡಿದ್ದೇವೆ. ನಮ್ಮ ಚೇತರಿಕೆ ಪ್ರಮಾಣ ಉತ್ತಮವಾಗಿದೆ. ಸಾವಿನ ಸಂಖ್ಯೆ ಕಡಿಮೆ ಇದೆ. ಬ್ರೆಜಿಲ್ ಮತ್ತು ಅಮೆರಿಕಕ್ಕಿಂತ ನಮ್ಮ ಪ್ರಕರಣಗಳ ಏರಿಕೆ ಸಂಖ್ಯೆ ಕಡಿಮೆ ಇದೆ. ಆದರೂ ಕೂಡ ನಾವು ಎಚ್ಚರಿಕೆ ತಪ್ಪಬಾರದು ಎಂದರು.
ಲಾಕ್ಡೌನ್ ಮುಗೀತು. ವೈರಸ್ ಹೊರಟುಹೋಯ್ತು ಎಂದು ಜನರು ಮೈಮರೆಯಬಾರದು. ಮಾಸ್ಕ್ ಇಲ್ಲದೆ ಹೊರಗೆ ಕಾಲಿಡುವ ಜನರು ತಾವಷ್ಟೇ ಅಲ್ಲ, ತಮ್ಮ ಕುಟುಂಬ ಸದಸ್ಯರಿಗೂ ಅಪಾಯ ತರುತ್ತಿದ್ದೇವೆಂದು ಅರಿಯಬೇಕು. ಫಸಲು ಬೆಳೆದು ಬಿಟ್ಟೆ ಅಂತ ಯಾರಾದರೂ ಖುಷಿ ಪಟ್ಟು ಕೂರಲು ಸಾಧ್ಯವಾ? ಫಸಲು ಬಂದ ಬಳಿಕವೂ ಸಾಕಷ್ಟು ಕಾರ್ಯಗಳನ್ನ ಮಾಡಬೇಕಾಗುತ್ತದೆ. ಈ ವಿಚಾರವನ್ನು ಜನರು ಗಮನದಲ್ಲಿಟ್ಟುಕೊಳ್ಳಬೇಕು ಎಂದು ನರೇಂದ್ರ ಮೋದಿ ಹೇಳಿದರು.
ಕೊರೋನಾ ವಿರುದ್ಧದ ಹೋರಾಟದಲ್ಲಿ ಭಾರತೀಯರಾದ ನಾವು ಬಹಳ ದೂರ ಬಂದಿದ್ದೇವೆ, ಆರ್ಥಿಕ ಚಟುವಟಿಕೆಗಳು ಕಾಲಕ್ರಮೇಣ ವೇಗವಾಗಿ ಬೆಳೆಯುತ್ತಲೇ ಇವೆ. ನಮ್ಮಲ್ಲಿ ಹೆಚ್ಚಿನವರು ನಮ್ಮ ಜವಾಬ್ದಾರಿಗಳನ್ನು ಹೆಗಲಮೇಲೆ ಹಾಕಿ, ಮತ್ತೆ ಜೀವನವನ್ನು ಚುರುಕುಗೊಳಿಸಲು, ಪ್ರತಿದಿನ ಮನೆಯಿಂದ ಹೊರಬರುತ್ತಿದ್ದೇವೆ. ಈ ಹಬ್ಬದ ಋತುವಿನಲ್ಲಿ ಮಾರುಕಟ್ಟೆಗಳು ನಿಧಾನವಾಗಿ ಮರಳುತ್ತಿವೆ. ಕಳೆದ 7-8 ತಿಂಗಳಲ್ಲಿ ಪ್ರತಿಯೊಬ್ಬ ಭಾರತೀಯನ ಶ್ರಮದಿಂದ ಇಂದು ನಾವು ಸುಧಾರಿಸಿದ್ದೇವೆ ಅಂಥ ಹೇಳಿದರು.
ಇಂದು ದೇಶದಲ್ಲಿ ಚೇತರಿಕೆಯ ದರ ಉತ್ತಮವಾಗಿದೆ, ಮರಣ ದರವು ಕಡಿಮೆ ಇದೆ. ವಿಶ್ವದ ಸಂಪನ್ಮೂಲ ಹೊಂದಿರುವ ದೇಶಗಳಿಗೆ ಹೋಲಿಸಿದರೆ ಭಾರತ ಹೆಚ್ಚು ಹೆಚ್ಚು ನಾಗರಿಕರ ಜೀವವನ್ನು ಉಳಿಸಲು ಸಮರ್ಥವಾಗಿದೆ. ಕೋವಿಡ್ ಸಾಂಕ್ರಾಮಿಕ ರೋಗದ ವಿರುದ್ಧದ ಹೋರಾಟದಲ್ಲಿ ಹೆಚ್ಚುತ್ತಿರುವ ಪರೀಕ್ಷೆಗಳ ಸಂಖ್ಯೆ ನಮ್ಮ ಒಂದು ದೊಡ್ಡ ಶಕ್ತಿಯಾಗಿದೆ. ಸೇವಾ ಪರಮೋ ಧರ್ಮದ ಮಂತ್ರದ ಮೇಲೆ ನಡೆಯುವ ಮೂಲಕ ನಮ್ಮ ವೈದ್ಯರು, ದಾದಿಯರು, ಆರೋಗ್ಯ ಕಾರ್ಯಕರ್ತರು ನಿಸ್ವಾರ್ಥಸೇವೆ ಮಾಡುತ್ತಿದ್ದಾರೆ. ಈ ಎಲ್ಲ ಪ್ರಯತ್ನಗಳ ನಡುವೆ, ಈ ಸಮಯವು ಅಜಾಗರೂಕವಾಗಿರಬೇಕಾದ ಸಮಯವಲ್ಲ. ಕರೋನಾ ಹೋಗಿದೆ ಅಂತ ನಾವು ಭಾವಿಸುವ ಸಮಯವಲ್ಲ, ಅಥವಾ ಕೊರೋನಾದಿಂದ ಈಗ ಯಾವುದೇ ಅಪಾಯವಿಲ್ಲ ಅಂತ ಕೂಡ ಅಂದುಕೊಳ್ಳಬೇಕಾಗಿಲ್ಲ ಅಂತ ಹೇಳಿದರು.
ಈ ಸಾಂಕ್ರಾಮಿಕ ಲಸಿಕೆ ಬರುವವರೆಗೂ ನಾವು ಕೊರೋನಾದೊಂದಿಗೆ ನಮ್ಮ ಹೋರಾಟವನ್ನು ದುರ್ಬಲಗೊಳಿಸಲು ಬಿಡಬೇಕಾಗಿಲ್ಲ. ನಮ್ಮ ದೇಶದ ವಿಜ್ಞಾನಿಗಳು ಲಸಿಕೆ ಕಂಡು ಹಿಡಿಯುವಲ್ಲಿ ನಿರತರಾಗಿದ್ದಾರೆ. ಭಾರತದಲ್ಲಿ, ಹಲವಾರು ಕರೋನಾ ಲಸಿಕೆಗಳ ಕೆಲಸವು ಇನ್ನೂ ನಡೆಯುತ್ತಿದೆ. ಕೊರೋನಾ ಲಸಿಕೆಯು ಪ್ರತಿಯೊಬ್ಬ ಭಾರತೀಯನಿಗೆ ಹೇಗೆ ಆದಷ್ಟು ಬೇಗ ಬರುತ್ತದೆ ಎಂಬ ಬಗ್ಗೆ ಸರ್ಕಾರದ ಸಿದ್ಧತೆಯೂ ನಡೆಯುತ್ತಿದೆ. ಒಬ್ಬ ನಾಗರಿಕನನ್ನು ತಲುಪಲು, ಅದು ಹೆಚ್ಚು ಹೆಚ್ಚು ಕೆಲಸ ಮಾಡಲಾಗುತ್ತಿದೆ ಅಂಥ ಹೇಳಿದರು.
